Սոսե ՀԿ-ն շարունակում է կանանց և երիտասարդ աղջիկների համար նախատեսված հանդիպումների շարքը։
Այս անգամ հանդիպեցինք #Սիսիան համայնքում, որտեղ մասնակիցների հետ քննարկեցինք ընտանիքի պլանավորմանը, վերարտադրողական առողջությանը, դրական ծնողավարմանը և երեխաների հետ արդյունավետ հաղորդակցությանը վերաբերող կարևոր հարցեր։
Մասնակիցների հետ խոսեցինք ընտանիքի պլանավորման վերաբերյալ տեղեկացված որոշումների կարևորության, ինչպես նաև ծնողավարման դրական և աջակցող մոտեցումների մասին։ Առանձին անդրադարձ եղավ երեխաների՝ տարիքին համապատասխան սեռական կրթությանը և ծնող-երեխա բաց ու վստահելի հաղորդակցության ձևավորմանը։
Քննարկեցինք նաև, թե ինչպես կարելի է տարբեր տարիքային փուլերում ավելի լավ հասկանալ երեխայի կարիքներն ու զգացմունքները, կառուցել փոխադարձ վստահության վրա հիմնված հարաբերություններ և աջակցել երեխայի ինքնուրույնության ու ինքնավստահության ձևավորմանը։
Հանդիպումների ընթացքում անդրադարձ եղավ նաև ծնողներին հանդիպող տարբեր մարտահրավերներին, հասարակության մեջ տարածված կարծրատիպերին և դաստիարակության այնպիսի մոտեցումներին, որոնք կարող են սահմանափակել երեխայի ազատ զարգացումն ու առողջ հարաբերություններ կառուցելու կարողությունը։
Հանդիպումներն անցան ակտիվ և անկաշկանդ մթնոլորտում։ Մասնակիցները ոչ միայն ստացան նոր տեղեկատվություն, այլև հնարավորություն ունեցան հարցեր բարձրացնելու, կիսվելու սեփական փորձով և միասին քննարկելու առօրյա կյանքում հանդիպող իրավիճակները։
Նման ձևաչափով հանդիպումները կարևոր են ոչ միայն նոր գիտելիքի ձեռքբերման, այլև փորձի փոխանակման, փոխադարձ աջակցության և ընտանիքում ավելի առողջ, հարգալից ու վստահելի հարաբերությունների ձևավորման համար: