Կապան համայնքում կայացավ «Ինչպես դառնալ դիմակայուն ճգնաժամային իրավիճակներում» ծրագրի շրջանակներում կազմակերպված հերթական հանդիպումը։
Միջոցառման նպատակն էր ամրապնդել համայնքի պատրաստվածությունը արտակարգ իրավիճակների պայմաններում՝ մասնակիցներին տրամադրելով անհրաժեշտ գիտելիքներ և գործնական հմտություններ՝ խուճապից խուսափելու և արդյունավետ արձագանքելու համար: Դասընթացի ընթացքում մասնակիցները քննարկեցին տարաբնույթ աղետների բնույթն ու պատճառները, գնահատեցին Կապան համայնքին բնորոշ ռիսկերն ու դրանց կանխարգելման հնարավոր ուղիները։
Հատուկ ուշադրություն դարձվեց արտակարգ իրավիճակներում ճիշտ վարքագծի կանոններին՝ ներառյալ տարհանման, հաղորդակցության և առաջին օգնության հիմնական սկզբունքները։ Ինտերակտիվ գործիքների և թիմային վարժությունների միջոցով մասնակիցները հնարավորություն ունեցան կիրառելու ստացած գիտելիքները գործնական իրավիճակներում՝ զարգացնելով թիմային աշխատանքը և արագ արձագանքման հմտությունները։
Հանդիպման ավարտին մասնակիցները բարձր գնահատեցին նախաձեռնությունը՝ նշելով, որ նման ծրագրերը մեծապես նպաստում են համայնքային դիմակայունության և համատեղ անվտանգության ապահովմանը։